|
9. BULETINA (2024ko martxoa)
HEMEN
Martxoaren 21ean iritsiko da 23.Korrika Etxebarrira. Etxebarritarrek Kukullaga eta La Basconia zubia lotzen dituen oinezkoen pasabidearen parean itxarongo dute, 13:30 aldera. BI-634 errepideko biribilgunera iristean, San Antoniora igo eta San Estebanera jaitsiko da lasterketa. Etxebarriko beheko aldean ibili ondoren, lekukoa Basauriko korrikalariei emango diete La Basconia zubian. Korrika ofizialaz gain, Etxebarrik bere Korrika Txikia antolatu ohi du. Martxoaren 22an izango da, eskola orduetan, eta arratsaldean, 18:30ak aldera, txokolatada eta musika izango dira Udaletxeko plazan.
HOR
Olgetan Udaberria programari hasiera eman diote Basauriko kultur eta gizarte etxeetan. Martxoaren 5ean hasi eta maiatzaren 29ra bitartean euskaraz ondo pasatzeko aukera izango dute 0-12 urte bitarteko umeek.
HAN
Euskararen geografia berria, hainbat mapa esanguratsutan.
ZER IKUSI...
Bizkarsoro herria ez da existitzen eta, era berean, Euskal Herriko edozein herri izan daiteke Bizkarsoro. Bizkarsorotarrak fikziozko herritarrak dira eta, era berean, euskaraz bizitzeagatik jazarriak izan diren euskaldun guztiak dira bizkarsorotarrak. 1914tik 1982ra bitartean gertatzen diren bost istoriok osatzen dute filma. Ahozko lekukotzetan eta idatzitako testuetan oinarritutako fikziozko bost istorio dira, bost hamarkadatako kontakizuna.
...HURA IKASI
Aurrealde edo aurreko alde / ez aurrekalde
|
|